Մակրոն. Ասադի պաշտոնազրկումն այլևս գերակայություն չէ
Ֆրանսիայի նախագահը չորեքշաբթի օրը հայտարարել է, որ Սիրիայի նախագահ Բաշար Ասադին իշխանությունից հեռացնելը Ֆրանսիայի դիտանկյունից Սիրիայի ճգնաժամի կարգավորման համար որևէ նշանակություն չունի: «Այսօր գերակա հարցը Սիրիայում ահաբեկչության դեմ պայքարն է». ասել է նա:
ԻՏԱՌ-ՏԱՍՍ-ի հաղորդման համաձայն` Էմմանուել Մակրոնը հավելել է. «Ասադի պաշտոնազրկումն այլևս նախապայման չի համարվում, քանի որ նրա համար օրինական այլընտրանք գոյություն չունի»:
«Որևէ բան ահաբեկիչների դեմ պայքարից առավել կարևոր չի կարող լինել և այս բնագավառում անհրաժեշտ է բոլոր կողմերի, հատկապես Ռուսաստանի համագործակցությունը»,-ընդգծել է Մակրոնը:
Նա նշել է, որ իր մյուս գերակայությունը Սիրիայի մասնատման կանխումն է: Մակրոնի խոսքերով. «Սիրիայի ճգնաժամի համար անհրաժեշտ է մշակել քաղաքական ու դիվանագիտական ուղեքարտեզ»:
ՄԱԿ-ում ԱՄՆ-ի ներկայացուցիչ Նիքի Հեյլին նույնպես ավելի վաղ հայտարարել էր, որ Բաշար Ասադի պաշտոնազրկումն այլևս Սիրիայում ԱՄՆ-ի գերակայությունը չի համարվում:
