Սիրիան ու Կորեական թերակղզու ճգնաժամը Լավրովի ու Թիլերսոնի հեռախոսազրույցի առանցքում
Ռուսաստանի ԱԳ նախարար Սերգեյ Լավրովը երեքշաբթի օրն ԱՄՆ պետքարտուղար Ռեքս Թիլերսոնի հետ հեռախոսազրույցի ժամանակ քննարկել է Սիրիայի հարցն ու Կորեական թերակղզում ճգնաժամը:
ԻՌՆԱ-ի հաղորդման համաձայն, ամերիկյան կողմի նախաձեռնությամբ տեղի ունեցած հեռախոսազրույցի ժամանակ Լավրովը կրկին անգամ անընդունելի է համարել Փխենյանի դեմ ԱՄՆ-ի չկշռադատված հայտարարություններն ու Կորեական թերակղզում լարվածության առկայության դեպքում տարածաշրջանում Վաշինգտոնի ռազմական տեղաշարժերի ընդլայնումե: Նա ընդգծել է Հյուսիսային Կորեայի պատժամիջոցներ գործադրելու փոխարեն քաղաքական լուծումների ու բանակցության այլընտրանքին դիմելու անհրաժեշտությունը:
Ռուսաստանի ԱԳ նախարարն ու ԱՄՆ պետքարտուղարը նաև քննարկել են Սոչիում նախատեսված Սիրիայի ազգային երկխոսության համագումարի կազմակերպման ու Սիրիայի հարցի լուծման ուղղությամբ իրականացված աշխատանքները:
Երաշխավորող երեք երկրներ՝ Իրանի, Ռուսաստանի և Թուրքիայի պայմանավորվածությամբ, միջսիրիական ազգային երկխոսության համագումարը հունվարի 29-ին և 30-ին գումարվելու է Ռուսաստանի Սոչի քաղաքում:
Հեռախոսազրույցի ժամանակ Լավրովն ու Թիլերսոնը խոսել են միջազգային տարբեր հարցերի, այդ թվում՝ Ուկրաինայի հարցի կարգավորման համար Մինսկի համաձայնագրի գործադրման ընթացքի լույսի ներքո այդ երկրում տիրող իրավիճակի մասին:
