Բրիտանիայի կառավարությունը Սաուդյան Արաբիային զենք է վաճառում
Բրիտանիայի լեյբորիստական կուսակցության առաջնորդը քննադատել է վարչապետ Թերեզա Մեյի կառավարությանը` Սաուդյան Արաբիային զենք վաճառելու համար:
Ջերեմի Քորբինն ընդգծել է, որ Լոնդոնը պետք է դադարեցնի զենք վաճառել Սաուդյան Արաբիային՝ Եմենում բռնությունները դադարեցնելու համար:
Բրիտանիայի լեյբորիստական կուսակցության ղեկավարը հայտարարել է, որ Սաուդյան կոալիցիայի կողմից Եմենի ժողովրդի ռմբակոծումը կատարվում է Բրիտանիայի կառավարության կողմից Ռիադին տրամադրած զենքերի միջոցով:
Արաբիան, հովանավորվելով ԱՄՆ-ի, Էմիրությունների և մի քանի այլ երկրների կողմից, 2015 թվականի մարտից ռազմական հարձակում է սկսել Եմենի վրա: Արաբիայի ռազմական քայլերի հետևանքով զոհվել են ավելի քան 14 հազար եմենցիներ, միլիոնավոր ուրիշներ հայտնվել են փախստականի կարգավիճակում:
ՄԱԿ-ը Եմենի ճգնաժամը բնութագրել է որպես աշխարհի ամենավատ հումանիտար ճգնաժամը և զգուշացրել, որ այս երկրի ժողովրդի իրավիճակը կարող է ավելի ողբալի դառնալ:
