اتمراوفرحان د افغانستان او فلسطین په وضعیت خبرې وکړې
په دې خبرو کې د فلسطین پر روان وضعیت او د اسراییلو پر وحشتونو هم خبرې شوې او ټینګار شوی چې ملګري ملتونه باید دلته روان خونړي وضعیت ته د پای ټکی کېږدي.
د افغانستان د بهرنیو چارو وزیر محمد حنیف اتمر د سعودي عربستان د بهرنیو چارو له وزیر شاهزاده فیصل بن فرحان سره تلیفوني خبرې کړي.
د افغانستان د بهرنیو چارو وزارت په یوه بیانیه کې ویلي چې دواړو لوریو د دوه اړخیزو اړیکو پر پراختیا او د افغان سولې پر روان بهیر بحثونه وکړل.
په بیان کې راغلي چې فیصل بن فرحان په دې ټلیفوني خبروکې له ښاغلي اتمر سره ژمنه وکړه چې د افغانستان د سولې له بهیر سره به هر اړخیزه همکاري کوي او په دې لټه کې دی چې په افغانستان کې روانه جګړه د خبرو له لارې ختمه کړل شي.
د بیان له مخې، دواړو لوریو همدا راز ټینګار وکړ چې په خپلو کې به اقتصادي، سیاسي او فرهنګي اړیکې پراخوي.
په دې خبرو کې د فلسطین پر روان وضعیت او د اسراییلو پر وحشتونو هم خبرې شوې او ټینګار شوی چې ملګري ملتونه باید دلته روان خونړي وضعیت ته د پای ټکی کېږدي.
دا خبرې داسې مهال کېږي چې له افغانستانه د ټولو بهرنیو ځواکونو د وتلو پر مهال په ډېرو ولایتونو کې د جګړې لیکې تودې شوي چې هره ورځ د درنې مرګ ژوبلې راپورونه ورکول کېږي.
د افغانستان حکومت طالبان د دغه تاوتریخوالي لامل بولي.
افغان چارواکي وایي د طالبانو د بریدونو لومړنۍ څپه یې شنډه کړې، خو په خبره یې که دغه وسله وال بریدونو ته نور هم زور ورکړي، ځواب یې ویلی شي.
