طالبانو سره د یوناما د مشري خبري اترې
د افغانستان لپاره د ملګرو ملتونو مرستندویه اداره یا یوناما خبر ورکوي چې د دې ادارې مشرې په دوحه کې د طالبانو له مذاکراتي پلاوي سره کتلي دي او د افغان سولې په تړاو ورسره ږغېدلې ده.
په کابل کې د ملګرو ملتونو سیاسي دفتر په خپله ټوېټر پاڼه لیکلي دي، چې د دوشنبې په ورځ دبورا لاینز د افغان سولې پروسې څخه د ملګرو ملتونو د ملاتړ په تړاو د طالبانو له مرکچي پلاوي سره خبرې کړي دي او ټینګار یې کړی چې جګړه باید ودرول شي او د سولې خبرو ته لومړیتوب ورکړل شي.
نوموړې ویلي د جګړې درېدل افغانان د سولې هیلې ته رسولی شي.
دا په داسې حال کې ده چې په افغانستان کې د افغان ځواکونو او وسلوالو طالبانو ترمنځ جګړې زور اخیستی او هره ورځ د ښکېلو لور ترڅنګ په کښې ملکي وګړو ته هم مرګ ژوبله اوړي.
د سولې بین الافغاني خبرې په تېره سېپټمبر میاشت کې په دوحه کې پيل شوي، خو له څو ځل مخامخ کتو او اجنډا جوړېدو پرته په کې بل کوم د پام وړ پرمختګ نه دی شوی.
