د افغانستان له نیمايي زیات خلک په انساني مرستو ژوند تیروي
د کډوالو نړيوال سازمان وايي ۵۹سلنه افغانان په نړیوالو بشري مرستو خپل ژوند تامینوي
د کډوالو نړيوال سازمان وايي چې په افغانستان کې د سخت بشري ناورين د حاکميت له کبله د دغه هېواد ۵۹ سلنه خلک په نړيوالو بشري مرستو خپل ژوند تامینوي.
دغه سازمان د يوه راپور په خپرولو سره ويلي چې په نړيوالو بشري مرستو د خپل ژوند د تامين کوونکو افغانانو شمېر ۲۴,۴ميلیونو تنو ته رسيږي.
دغه سازمان له افغانستان سره د نړيوالو مرستو د دوام غوښتنه کړې او ویلي چې د سخت فقر له کبله دغه هېواد د سيستماټيکې پاشلتيا له ګواښ سره مخامخ دی.
د کډوالو نړيوال سازمان په راپور کې د افغانستان د بېوزلۍ تر څنګ د خوراکي او نورو توکيو د بېسارې ګرانۍ يادونه هم شوې ده.
آيي او ايم خپله له څه باندې ۱،۳ميليونه افغانانو سره د خوړو، موقتې سرپناه، روغتيايي او نورو خدمتونو په برخه کې د خپلو مرستو خبر هم ورکړی او ویلي یې دي چې دا مرستې ېې د تېر يوه کال په موده کې کړي دي.
