افغانستان ته د ازبکستان وارداتي برښنا پرې شوې ده
افغانستان ته د ازبکستان وارداتي برښنا د جمعې په ورځ د برښنا لېږد په شبکې کې د تخنینکي ستونزې رامنځته کېدو له امله پرې شوه.
د افغانستان د اړتیا ۷۵ سلنه برښنا وارداتي ده چې له ایران، تاجیکستان، ازبیکستان او ترکمنستان څخه واردېږي. هر کال د ژمي او یخنۍ په موسم کې، له یادو هېوادونو څخه د برښنا د وارداتو کچه کمېږي. افغانستان هرکال نږدې ۲۸۰ میلیون ډالر له سیمې او ګاونډیو هېوادونو څخه د برښنا پېرلو لپاره ورکوي.
له کابل څخه زموږ د خبریال د راپور له مخې، د جمعې په ورځ د برښنا لېږد په شبکې کې د تخنیکي ستونزې رامنځته کېدو له امله افغانستان ته د ازبیکستان د وارداتي برښنا په پرې کېدو سره، یوځلي بیا د هېواد شمالي برخې د برښنا له نشتون سره مخ شوې. د ازبیکستان د برښنا پرې کېدل په داسې حال کې دي چې د افغانستان د پلازمېنې کابل په ګډون د ډېری شمالي ولایتونو اوسېدونکي ډېرې سختې ورځې تجربه کوي.
د افغانستان برښنا شرکت زیاته کړې: د ازبیکستان د برښنا ادارې چارواکو ویلي چې د تخنیکي ستونزې هوارولو او افغانستان ته د برښنا صادراتو بیا پیل لپاره هڅې دوام لري. د ازبیکستان له وارداتي برښنا څخه په کابل او د افغانستان په ۱۱ ولایتونو کې کار اخیستل کېږي.
څه موده وړاندې د افغانستان برښنا شرکت له ازبیکستان سره د برښنا واردولو تړون د یوه بل کال لپاره وغځاوه.
هرات ولایت ته د ترکمنستان وارداتي برښنا هم دوه ورځې وړاندې پرې شوې وه، خو د افغانستان برښنا شرکت بیا د ترکمنستان د برښنا له بیاځلي نښلولو خبر ورکړی دی.
