په افغانستان کې د سلګونو تنفسي ناروغانو درملنه شوې
زمونږ خبریال وايي د افغانستان په جنوبي سیمه کې څه دپاسه (۲۰۰) هغه ناروغان روغ شول چې تنفسي ستونزې یې درلودې.
یاد ناروغان د زابل ولایت په (میزانه) ولسوالۍ کې روغ شوي چې د زابل د عامې روغتيا درياست د چارواکو په خبره یاد ناروغان ( ٢١٩) کسان وو چې مختلفې تنفسي ناروغۍ یې درلودې.
د زابل د عامې روغتیا رئیس ډاکټر عبدالحکیم حکیمي رسنیو ته ویلي چې د سروېلانس پرسونل او د تطبېق کوونکې انجو روغتیایي ټیمونه یې سیمې ته لیږلي تر څو یې دیادو ناروغانو درملنه ترسره کړه.
نوموړي ویلي د سيمې (۱۷۹) ماشومانو ته واکسین ورکړه شوی ترڅو له بېلابېلو ناروغيو څخه مخه ونیول شي او په خبره یې روغتيايي ټيمونه به هلته د څو ورځو لپاره پاته وي ترڅو ټولو کلیو ته د واکسین تطبيق ورسیږي او دناروغیو د کنټرول سمه چاره رامنځته شي.
باید وویل شي چې دژمي په دې ساړه موسم کې د افغانستان په ډیریو سیمو کې د سړې هوا او د ځان ته د نه پاملرنې په خاطر ډیری خلک له مختلفو تنفسې ناروغیو سره مخ کیږي.
