په جوزجان او زابل کې ۱۰تنو ته مرګ ژوبله اوښتې

په جوزجان او زابل کې د ناچاودو توکو له امله درې تنه وژل شوي او شاوخوا اووه نور ټپیان دي.

د کلید ګروپ د خبر له مخې، د جوزجان ولایت د امنیه قومندانۍ ویاند قاري عبدالستار حلیمي وايي، چې تېره ورځ د یاد ولایت په قوش تپې ولسوالۍ کې د لاسي بم د چاودنې له امله، دوه ماشومان وژل شوي او څلور نور ټپیان دي.

په همدې حال کې د زابل د امنیه قومنداني ویاند ذبیح الله زهیر ویلي چې په دغه ولایت کې هم د پخوانيو ناچاودو توکو د چاودنې له امله، یو کس وژل شوی او درې نور ټپیان دي.

د هغه په خبره، پېښه د «سره غره د سرخوګانو» په سیمه کې هغه مهال رامنځته شوې، کله چې د کوچیانو تراکتور پر خښ شوي ماین ور برابر شو.

د یادونې وړ ده چې لاهم افغانستان د پخوانیو ناچاودو توکو د چاودونو له کبله تر ټولو ډېر زیانمن شوی هېواد دی.