پاکستان د کډوالو سربېره سوداګرۍ کې هم خنډ جوړ کړی
په اسلام آباد کې د افغانستان سفارت پر خپله ټویټر پاڼه لیکلي، چې په پاکستان کې د افغان کډوالو پر ستونزو سربېره اوس د پاکستان د سوداګرۍ وزارت له خوا د افغان ټرانزیټ او په دوه اړخیزې سوداګرۍ کې هم یو لړ خنډونه جوړ کړي.
د سپوږمۍ رايو د خبر له مخې، دغه سفارت زیاتوي، چې په تېر کې د تورخم د دروازې تړل کېدو او په صفري نقطو کې په مختلفو پلمو د افغاني توکو ځنډولو له امله زیاتره توکي له منځه تللي وو او سوداګرو ته درانه زیانونه واوښتل.
دوی زیاتوي، پاکستاني لوري په وروستیو کې د افغانستان ټرانزیټ پرمخ هم بېلابېلې ستونزې جوړې کړي، چې تازه یې د تورچای، ټایر، د سینګار توکي، نساجي، کورني استعمال توکي او داسې نورو توکو پر ټرانزیټ بې موجبه بندیز لګولی چې د اپټا له تړون سره په ټکر کې دی.
دا په داسې حال کې ده، چې پاکستاني چارواکو د افغان کډوالو د شړلو لړۍ چټکه کړې ده.
پاکستاني چارواکو افغان کډوالو ته د روان میلادي کال د نومبر تر لومړۍ نېټي وخت ورکړی، چې له دغه هېواده ووځي.
