سږ کال د خټکیو حاصلات ښه؛ خو بازار یې کمرنګه دی
په سمنګان ولایت کې سږکال بزګرانو پخپلو کروندو کې په پراخه پیمانه خټکي کرلي؛ خو د خرڅلاو له کمرنګه بازار څخه یې اندېښنه لري.
د دې ولایت کروندګر وایي، چې د تېر کال په پرتله د خټکیو حاصلاتو کچه دوه برابره زیاته شوې؛ خو بیو ته په کتو یې خپل لګښتونه هم نه شي پوره کولای او زیاتوي، که د پېر او پلور اوسنی وضعیت دغه ډول دوام پیدا کړي؛ نو له سخت زیان سره به مخ شي.
کروندګر وایي، چې حکومت دې په بهر هېوادونو کې د خټکیو د بازارموندنې لپاره زمینه برابره کړي؛ ترڅو په مناسبه بیه وپلورل شي.
په ورته وخت کې سوداګر بیا وایي، چې بهر هېوادونو ته محصولات په کمه اندازه انتقالېږي؛ خو د مېوو د فصل پرمهال د پاکستان له لوري په بندرونو کې د لوړې تعرفې اخیستل او ځنډول، د تازه مېوو د بیو د راټیټېدو او خرابېدو لامل کېږي.
بل پلو د سمنګان ولایت د کرنې او مالدارۍ مشر عبدالمتین کریمي هم د کروندګر شته ستونزې مني او وایي، چې تل یې د بزګرانو ملاتړ او لاسنیوی کړی او په راتلونکي کې د همکارۍ ډاډ ورکوي.
د مالوماتو له مخې، په سمنګان ولایت کې په ۱۴ زره هکټاره ځمکه باندې خټکي کرل شوي او د اټکل مخې به شاوخوا ۸۰ ټنه د خټکیو حاصلات ترلاسه شي.
