د افغانستان ۱۲ ګمرکونو کې الکترونیکي سکینرونه نصبیږي
د افغانستان سرپرست حکومت د رئیس الوزرا اقتصادي معاونیت له لورې د هېواد په دولسو ګمرکونو کې د الکترونیکي سکینرونو د نصبولو تړون لاسلیک شوی
د دغه معاونیت له خوا د يوې خبرپاڼې په خپرولو سره ویل شوي: دغه قرارداد تېره ورځ د ماليې وزارت او يوه خصوصي شرکت ترمنځ د اته ميليارده افغانيو په پانګونې لاسليک شو.
خبرپاڼه زیاتوي: د دې پروژې عملي چارې به دوه کاله وخت ونیسي او په ترڅ کې به یې شاوخوا دوه زره کسانو ته په مستقیم او غیر مستقیم ډول د کار زمینه برابره شي.
د دې قرارداد له مخې، د دې پروژې قراردادي شرکت به د تورخم، هرات، سپین بولدک، اسلام کلا، تورغونډۍ، نیمروز، ابو نصر فراهي، خوست، پکتیا، اقینه او شیرخان بندرونو او د هيواد هوایي میدانونو ته لیږدونکي هر ډول توکې سکین کوي.
د سرپرست حکومت د پانګونې د اسانتیاوو رئیس احمدضیا خالد د دغه تړون د لاسلیک په مراسمو کې وویل: دغه اقدام د هېواد په ګمرکونو کې د امنیت د لا ښه ټینګښت په موخه ترسره شوی دی.