مخالفان هڅه کوي د افغانستان پر ضد جبهه جوړه کړي
د افغانستان د طالبانو د حکومت د سرحدونو، قومونو او قبایلو وزیر ټینګار کړی چې د افغانستان مخالفان هڅه کوي د هېواد پر ضد یوه جبهه جوړه کړي.
د تسنیم خبري اژانس د راپور له مخې، د افغانستان د طالبانو د حکومت د سرحدونو، قومونو او قبایلو وزیر، نورالله نوري، ویلي چې مخالفان هڅه کوي د افغانستان پر ضد یوه جبهه رامنځته کړي او خپل فعالیتونه د «افغانستان د آزادولو» په شعار سره مخته وړي.
هغه د افغانستان په شمال کې د سرپل ولایت د سفر پر مهال وویل:هغه کسان چې په تېرو شلو کلونو کې یې په افغانستان کې خپلې موخې تعقیبولې، اوس باید د افغانستان د آزادۍ شعار ور نه کړي. دغه کسان نور په افغانستان کې هېڅ ځای نه لري.
د افغانستان د طالبانو وزیر د افغانستان اوسني وضعیت ته په اشارې سره ادعا وکړه چې پر هېواد واکمن نظام د اسلامي شریعت پر بنسټ اداره کېږي او خلک هم پرته له کوم جبَره د طالبانو له حکومت څخه ملاتړ کوي.
نوري همدارنګه وویل چې واک ته د طالبانو له بېرته ستنېدو وروسته، کورني اختلافونه، غچاخیستنې او جګړې پای ته رسېدلې او د افغانستان په ټول هېواد کې امنیت ټینګ شوی دی.
طالبانو د ۲۰۲۱ کال د اګست میاشتې راهیسې، چې بېرته واک ته رسېدلي، تل خپل مخالفان د افغانستان د بېثباته کولو په هڅو تورن کړي دي.
په مقابل کې، پر طالبانو نیوکه کونکي او نړیوال بنسټونه په دوامداره توګه پر ښځو د محدودیتونو، د ټولشموله حکومت د نشتوالي او په افغانستان کې د ترهګرو ډلو د شتون په اړه نیوکې کوي.
