قرغیزستان د تروریستي ډلو له لیست څخه د طالبانو نوم ایستلی دی

د سرپرست حکومت د بهرنیو چارو وزارت ویلي چې، قرغیزستان د ممنوعه ډلو له نوملړ څخه د طالبانو نوم ایستلی دی.

د قرغیزستان چارواکو تر اوسه په دې اړه رسمي تبصره نه ده کړې. د قرغیزستان د لوی څارنوالۍ په سایټ کې د ترهګرو او افراطي سازمانونو یو لیست شته چې د طالبانو نوم پکې نه لیدل کېږي.

د سرپرست حکومت د بهرنیو چارو وزارت په یوه خبرپاڼه کې ویلي، چې د قرغیزستان دغه اقدام په سیمه ایزه او نړیواله کچه د دوی د سیاسي پېژندګلوۍ د زیاتوالي ښودنه کوي.

دغه وزارت همدارنګه زیاته کړې، چې د قرغیزستان دغه اقدام د سرپرست حکومت او نورو هېوادونو ترمنځ د اړیکو د پیاوړتیا پر وړاندې خنډونه لرې کوي.

تراوسه هېڅ هېواد افغان سرپرست حکومت په رسمیت نه دی پېژندلی. خو د منځنۍ آسیا یو شمېر هېوادونه له دوی سره ډیپلوماتیکې او اقتصادي اړیکې لري.