افغان ښځې د ګټې‌وټې لپاره ډېر لږ فرصتونه لري

د خوړو نړیوال پروګرام (ډبلیواېف‌پي) ویلي چې د طالبانو تر واک لاندې افغانستان کې ښځې د ګټې‌وټې د موندنې لپاره ډېر لږ فرصتونه لري.

ډبلیواېف‌پي دا موضوع چهارشنبه د تلې پر ۱۱مه، په اېکس‌پاڼه کې د یوې خپرې شوې اعلامیې له مخې کړې ده.

د خوړو نړیوال پروګرام ویلي چې دا بنسټ له زرو افغان ښځو سره مرسته کوي.

په اعلامیه کې راغلي: «د خوړو نړیوال پروګرام په ټول افغانستان کې له زرګونه ښځو سره چې ټولې یې د کورنیو سرپرستانې دي، مرسته کوي ترڅو مهارتونه زده کړي او په خپلو پښو ودرېږي.»

پر افغانستان واک ته د طالبانو له رسېدو وروسته دغې ډلې پر ښځو د محدودیتونو د لګولو ترڅنګ، هغوی د کار له حقه هم بې برخې کړي دي.

په تېرو درېیو کلونو کې د افغانستان ډېری کورنۍ، په ځانګړې توګه هغه کورنۍ چې ښځې یې سرپرستي کوي، له جدي اقتصادي ننګونو سره مخ دي.