یوناما: په افغانستان کې رسنۍ د زوال په حال کې دي
د افغان رسندویو له راپور سره سم په افغانستان کې د ملګرو ملتونو سیاسي دفتر (یوناما) د مطبوعاتو نړیوالې ورځې په مناسبت اعلان کړی چې په افغانستان کې آزادې او خپلواکې رسنۍ د زوال په حال کې دي.
یوناما نن په یوه اعلامیه کې زیاته کړې چې رسنۍ د طالبانو له لګول شویو محدودیتونو او اقتصادي فشارونو سره مخ دي.
د یوناما مشرې روزا اوتونبایوا، ویلي: « د روڼتیا، عامه باور او ښې حکومتولۍ لپاره متنوع او سالم رسنیز سکټور اړین دی. خو په افغانستان کې موږ د ازادو او خپلواکو رسنیو د تدریجي زوال شاهدان یو.»
دغه بنسټ خبرداری ورکړی چې خبریالان د نیول کېدو، شکنجې او زنداني کېدو له خطر سره مخ دي.
یوناما وايي، ښځینه خبریالانې په ځانګړې توګه له خطرونو او نابرابرو خنډونو سره مخ دي.
په همدې حال کې « د بې پولې خبریالانو» سازمان پرون په نړۍ کې د مطبوعاتي آزادۍ د وضعیت په تړاو راپور خپور کړی چې پکې ویل شوي افغانستان د ۱۸۰ هېوادونو له منځه په ۱۷۵م مقام کې دی.
له بلی خوا ګوترېش: ویلی دی د خلکو آزادي د مطبوعاتو آزادۍ پورې تړلې
د ملګرو ملتونو سرمنشي انتونیو ګوتریش په یوه پیغام کې ویلي، چې د خلکو آزادي د مطبوعاتو په آزادۍ پورې تړلې ده.
نوموړي ټینګار کړی چې خبریالان باید له وېرې او تبعیض پرته د خبریالۍ فعالیتونه وکړي.
ګوترېش داسې مهال دا څرګندونې کوي، چې د راپورونو له مخې د طالبانو په حاکمیت کې افغان خبریالان او رسنۍ له ګواښونو سره مخ دي.
ګوتریش زیاته کړې چې ژورنالېزم د وخت په تېرېدو ګواښمن کېږي او خبریالان یې د بریدونو، نیول کېدو، سانسور، تاوتریخوالي او د مرګ له ګواښ سره مخ بللي دي.
