د ایران او افغانستان په پولو کښې حالات نورمال دي
طالب چارواکو وویل چې د ایران او افغانستان په پولو کښې د لاریو او ټرکونو تګ راتګ په عادي توګه روان دی.
پارس ټوډی د فارس خبري آژانس په حواله لیکلي دي، د هرات ولایت د اسلام قلا په کمشنرۍ کښې مسئولان وايي چې په ایران کښې د جنګ او شخړو له دوام سره سره د ایران او افغانستان ترمینځ د سوداګري شیانو ټرانزټ او د تګ راتګ بهیر په عادي توګه دوام لري.
د هرات د اسلام قلا کمشنر مولوي حضرت زعیم آغا وايي چې دمګړۍ د افغانستان او ایران په پوله کښې هره ورځ ۶۰۰ باري لارۍ ایران ته ځي او ۷۰۰ باري لارۍ د هم دغه ګمرک له لارې افغانستان ته راځي او د تجارتي شیانو انتقال بې له هیڅ ستونزې دوام لري.
په عین حال کښې د هرات سیمه ایز چارواکي وايي چې په کورنیو بازارونو باندې جدي څارنه لري او سوداګرو ته خبرداری ورکړی شوی چې له موجوده حالاتو ناوړه استفاده ونه کړي.
د ولایت مقام ویاند محمد یوسف سعیدي وايي، هر سوداګر چې د ایران د لارو د بندیدو په پلمه د شیانو بیه په خپل سرې توګه لوړه کړي، له جدي او قانوني چلند سره به مخامخ شي.
په عین حال کښې په هرات کښې د ایران د اسلامي جمهوریت سرکنسول وايي چې د جنګي حالاتو سره سره، د ایران او افغانستان ترمینځ تجارتي اړیکې بحال دي خو د امریکې له خوا د ایران د ځینو تجارتي بندرونو په نښه کیدو په ځینو برخو کښې د شیانو د انتقال په بهیر کښې سختۍ رامینځته کړې دي.
د رسمي احصائیو له مخې، دمګړۍ د ایران او افغانستان ترمینځ د سوداګرو مبادلاتو سویه په کال کښې کابو څلور میلیارډ ډالر بلل کیږي چې ستره برخه یې په هرات ولایت کښې د اسلام قلا سرحد له لارې ترسره کیږي.
