افغانستان ته له کډوالۍ ۸۲۸ افغانان ستانه شوي
د سرپرست حکومت د کډوالو ستونزو ته د رسېدنې کمېسیون اعلان کړی، چې یوازې د جمعې په ورځ اته سوه اته ویشت افغان کډوال د تورخم او سپین بولدک له دروازو له پاکستان څخه هېواد ته راستانه شوي دي.
دغه ادارې ویلي، چې په همدې وخت کې دوه سوه څلرویشت نور افغان کډوال د اسلامکلا له لارې له ایران څخه افغانستان ته داخل شوي دي.
دا راستنېدنې په داسې حال کې ترسره کېږي چې تر دې وړاندې هم له ګاونډیو هېوادونو څخه د افغان کډوالو د پراخو جبري راستنېدنو راپورونه ورکړل شوي دي.
د رسمي شمېرو له مخې، د دوه زره درویشت کال له سپټمبر میاشتې راهیسې شاوخوا شپږ میلیونه افغان کډوال له پاکستان او ایران څخه افغانستان ته راستانه شوي دي.
دا په داسې حال کې ده چې ملګري ملتونه وایي، د کډوالو د پراخو راستنېدنو له امله په وروستیو کلونو کې د افغانستان نفوس شاوخوا لس سلنه زیات شوی؛ هغه بهیر چې د هېواد پر محدودو سرچینو فشار او بشري ناورین یې لا پسې زیات کړی دی.
