ننګرهار کې د «میهن» روغتیايي بنسټ دفتر تړل شوی
د ننګرهار امنیتي او تصفیوي کمېسیون وايي، په دغه ولایت کې یې د «میهن» په نوم د روغتیايي خدمتونو وړاندې کوونکي بنسټ دفتر د قانوني جوازونو او له اړوندو ادارو سره د نه همغږۍ له امله تړلی دی.
د ننګرهار د والي ویاند له دفتره رسنیو ته په استول شوې خبرپاڼه کې ویل شوي، چې دغه بنسټ له تېرو اتو میاشتو راهیسې د عامې روغتیا له ریاست سره فعالیت درلود، خو د عامې روغتیا وزارت د کار جواز یې نه درلود او له اقتصاد وزارت سره یې هم لازمې همغږي نه وې کړې.
خبرپاڼه زیاتوي، چې د بنسټ مشرتابه د هېواد نافذه قوانینو ته د ژمنتیا په برخه کې ستونزې لرلې او د دې ادارې د ولایت مسؤل بست هم تر اوسه خالي و.
د کمېسیون د پرېکړې له مخې، د «میهن» دفتر تر هغه وخته تړل شوی چې دغه بنسټ د نافذه قوانینو له مخې د فعالیت لپاره لازم شرایط برابر کړي. د بیا فعالیت په اړه به وروسته پرېکړه وشي.
«میهن» بنسټ د ننګرهار په مرکز او ولسوالیو کې له سلو څخه د زیاتو روغتیايي مرکزونو د تمویل او تجهیز مسؤلیت درلود او لسګونه نارینه او ښځینه کارکوونکي یې لرل.
