افغانستان کې د میلیونه کسان د څښاک اوبو څخه بې برخې دي

د ملګرو ملتونو د بشري استوګنې پروګرام اعلان کړی چې د اوبو د حیاتي اهمیت سربېره، په افغانستان کې میلیونونه کسان لا هم د څښاک پاکو اوبو ته له لاسرسي بې برخې دي.

له ملګرو ملتونو سره تړلې دغه ادارې ټینګار کړی چې په ټول افغانستان کې د څښاک اوبو ته د خلکو د عمومي لاسرسي د برابرولو لپاره باید هڅې زیاتې شي.

دغه ادارې زیاته کړې چې د اوبو د سرچینو د ساتنې، د روغتیايي وضعیت د ښه والي او په افغانستان کې د لا روغو ټولنو د جوړولو لپاره هوښیار ښاري پلان جوړونې، د اوبو د سرچینو سم مدیریت او د کثافاتو مدیریت ته جدي اړتیا ده.

دا په داسې حال کې ده چې افغانستان په وروستیو کلونو کې په تېرو لسیزو کې د وچکالۍ او اقلیمي بدلونونو له یوه تر ټولو سخت بحران سره مخ شوی دی.