پاکستان په افغانستان کې دامن دټینګولو لپاره غوره رول لوبولی شی
زمونږخبریال دډان خبری سایټ له قوله راپورراکړ په پاکستان کې د افغانستان سفیر او د افغان ولسمشر ځانګړى استازى عمر زاخیلوال نن په اسلام آباد کې د افغانستان د سولې په اړه په نړیوال کنفرانس کی وویل، که پاکستان او هند په ګډه هلې ځلې وکړی،نو افغانستان کې سوله ممکنه ده.
هغه زیاته کړې: له افغانانو مخلص خلک هېڅوک نشته، زموږ پر رول دې څوک شک نه کوی.
زاخېلوال په افغان سوله کې د پاکستان رول مهم وباله او زیاته یې کړه ،له پاکستان پرته هېڅوک په دې برخه کې د آسانچاری یا سهولت کار په توګه رول نه شی لوبولى.
هغه وویل، که چېرې پاکستان او هندوستان په ګډه د افغان سولې لپاره هلې ځلې وکړی؛ نو سوله راتللى شی، خو نوموړی په دې توګه کې د سعودی عربستان او ایران پر رول هم ټینګار وکړ.
په سیمه کې د سولې د هلو ځلو په اړه زاخېلوال وویل، پر سولې تر خبرو مخکې باید د سولې په معنا ځان پوهول په کار دى،په ٢٠٠١ کال کې امریکایی ایتلاف څرګندې موخې درلودې، خو د وخت تېرېدلو سره فضا ګډه وډه شوه او دغه موخې تر پوښتنې لاندې ورغلې .
د افغانستان سفیرپخپلې ویناکې دا پوښتنه مطرح کړه چې آیا د ترهګرۍ پر وړاندې جګړه یوه تېروتنه وه.؟.زاخېلوال په افغانستان کې د سولې او ثبات لپاره له اخلاصه پر ډکو سیمه ییزوملګرتیاؤ ټینګار وکړ او وې ویل، د سولې لپاره د بېلا بېلو لورو هلې ځلې شوې، خو لاسته راوړنې یې نه درلودې.
هغه وویل ، داعش ترهه ګره ډله د یوه داړونکی حیوان په توګه د پرمختګ په حال کې ده، او دم ګړۍ د داعش او طالب ترمینځ د واک پر سر جګړه روانه ده.
هغه زیاته کړه، د سیمې ځینې هېوادونه د وسله والو طالبانو ملاتړ کوی، او ترڅو دغه ملاتړونه غوڅ نشی په سیمې په تیره بیا په افغانستان اوپاکستان کې امن اوثبات راتلل ګران دی .
