حامد کرزے اقتدار ته د ستنېدو په فکر کښې
پخواني افغان ولسمشر حامد کرزي د افغانستان د ولسمشرۍ په راتلونکو انتخاباتو کښې د ځان د نامزدګۍ د احتمال خبر ورکړ.
د افغان آوا خبري اژانس د رپوټ له مخې حامد کرزي د جرمني له شپيګل مجلې سره په مرکه کښې د افغانستان د ولسمشرۍ د ۲۰۱۹ کال د انتخاباتو لپاره د ځان د نامزدګۍ احتمال رد نه کړ.
له دې مخکې حامد کرزي ويلي وو چې د افغانستان د ولسمشرۍ په رتلونکو اتخاباتو کښې د ګډون کولو فېصله يې نه ده کړې.
حامد کرزي په افغانستان ديارلس کاله حکومت وکړ او د بن له وړومبۍ غونډې وروسته د شپږو مياشتو لپاره د موقته حکومت د مشر په توګه ټاکل شوے ؤ.
د موقته دورې له ختمېدو وروسته په ۲۰۰۲ ميلادي کال کښې په کابل کښې هنګامي لويه جرګه جوړه شوه او دغې جرګې حامد کرزے د دوو نورو کلونو لپره د انتقالي حکومت د مشر په توګه وټاکۀ.
حامد کرزے د ۲۰۰۴ کال په انتخاباتو کښې کامياب شو او دوه دورې په رسميت توګه د خلقود منتخب ولسمشر په توګه خدمت وکړ او له دې وروسته يې اقتدار اشرف غني ته وسپارۀ.
