په کابل کښې د افغانستان د پارلېماني انتخاباتو د نامزدانو احتجاجي غونډه

د افغانستان د پارلېماني انتخاباتو په سلګونو نامزدانو او د هغوي پلويانو د کابل ولايت د انتخاباتو په ابتدائي نتائجو باندې په اعتراض کښې د انتخاباتي شکايتونود کمېشن په وړاندې احتجاجي غونډه وکړه.

د افغان آوا خبري اژانس د رپوټ له مخې اعتراض کونکو نامزدانو د افغانستان د انتخاباتي شکايتونو له کمېشنه وغوښتل چې د کابل ولايت د انتخاباتو ابتدائي نتيجې دې باطلې اعلان کړي او انتخابات دې بيا وشي.

د دغه کمېشن مشر عبدالعزيز آريائي احتجاج کونکو ته اطمينان ورکړ چې د انتخاباتي نامزدانو په ټولو شکايتونو به غور وکړي.

د افغانستان د پارلېماني انتخاباتو د نتيجو له اعلانه د دريو مياشتو د تېرېدو باوجود د دغو انتخاباتو په سر لانجې او کشمکشونه هم هغه شان دوام لري.