له افغانستانه د امریکايي پوځیانو وتل وخت ته اړتیا لري
د افغانستان په چارو کښې د امریکې ځانګړي استازي وویل چې له دې جنګ ځپلي هیواده د امریکايي پوځیانو وتل څو کاله وخت ته ضرورت لري.
د تسنیم خبري آژانس د خبر له مخې زلمي خلیلزاد په قطر کښې د امریکې او طالبانو د استازو ترمینځ د خبرواترو پنځو پړاؤنو ته اشاره وکړه او زیاته یې کړه: امریکا په دې مذاکراتو کښې له افغانستانه د خپلو پوځیانو د ایستلو په سر موافقې ته نه ده رسیدلې او د داشان موافقې احتمال هم ډیر کم دی.
دغه په خَټه افغان امریکايي سفارتکار څرګنده کړه چې له طالبانو سره موافقه ممکنه ده په افغانستان کښې د جنګ له ختمیدو وروسته وشي.
له افغانستانه د امریکې په قومندې د بهرنیو پوځیانو وتل، د قطر په مذاکراتو کښې د طالبانو یو اصلي شرط دی.
د سیمې د سیاسي مسایلو کارپوهان په دې باور دي چې د خلیلزاد دا څرګندونې د دوحې د خبرواترو د ماتې او همداشان په افغانستان کښې د امریکايي پوځیانو د ساتلو لپاره د امرکیې د پروګرام په معنا دي.
