کرزی: د جګړې دوام د پردیو دسیسې بریا ته رسول دي
کرزي یو ځل بیا له ښکیلو خواو غوښتي چې د سولې لپاره رامنځته شوی فرصت دې نه ضایع کوي او ژر تر ژره دې د سولې لپاره چټک اقدامات تر سره کړي.
د افغانستان پخوانی ولسمشر حامد کرزی وايي: روانه جګړه په اصل کې د پردیو دسیسې بریا ته رسول دي، او په خبره یې د جنګ ښکیلې خواوې دې له جګړې لاس واخلي او د خبرو له لارې دې خپلې ستونزې حل کړي.
دده په خبره په افغانستان کې د جګړو او نظامي عملیاتو دوام د پردیو د هغو دسیسو بریالي کول دي چې غواړي د سولې روانه پروسه ناکامه او جګړه دوامداره شي.
کرزي یو ځل بیا له ښکیلو خواو غوښتي چې د سولې لپاره رامنځته شوی فرصت دې نه ضایع کوي او ژر تر ژره دې د سولې لپاره چټک اقدامات تر سره کړي.
هغه په غزني او وردګو کې د ملکي وګړو پر موټر د ماین چاودنې غندلي، او د ملکیانو وژل یې ستر بشري جنایت بللی دی.
کرزي دغه څرګندونې داسې مهال کړي چې تر دې وړاندې هم ګڼو نړیوالو او کورنیو بنسټونو له طالبانو د جګړو د کمولو غوښتنه کړې وه.
