د افغان حکومت او طالبانو مرکچي ډلو په دوحه کښې غونډه وکړه
د افغانستان د صلحې بل پړاو خبرې په مقدماتي ډول په یوه ورځ ځنډ تیر ماښام پیل شوې
تاند خبري سایټ لیکلي چې د افغانستان حکومت او طالبان وايي چې د بیګانۍ غونډه مقدماتي وه او په لړ کې یې پرېکړه وشوه چې د دواړو خواوو له لوري ټاکل شوي ټیمونه دې د اجنډا پر موضوعاتو د شنبې له ورځې بحثونه پیل کړي.
له دې وړاندې پرون د افغانستان د دولت د مرکچي پلاوي یوه غړي وویل چې د طالبانو د مرکچي پلاوي ټول غړي دوحې ته نه دي رارسېدلي او له همدې کبله خبرې نه دي پیل شوې.
د افغانستان د دولت د مرکچي پلاوي یوه بل غړي بیا وویل چې د دولت د مرکچي پلاوي ټول غړي هم دوحې ته نه دي رسېدلي.
ښايي همدا وجه وي چې د رسمي خبرو پیل یې د شنبې ورځې ته ځنډولي دي.
دواړو خواوو په لومړي پړاو کې، چې د سپټمبر په ۱۲ یې پیل کړی و، یوازې د رسمي خبرو پر اجنډا موافقه وکړای شوه.
د اجندا پر سر له موافقې وروسته د دواړو خواوو د پرېکړې پر اساس په خبرو کې وقفه راوړل شوه.
