په افغانستان کې د ملګرو ملتونو په کاروان باندې برید
Feb 13, 2021 03:06 Asia/Kabul
نامعلومه وسلوالو د کابل ـ جلال آباد پر لویه لار د افغانستان لپاره د ملګرو ملتونو استازولۍ یا یوناما پر موټریز کاروان برید کړی چې په ترڅ کې پنځه افغان سرتېري وژل شوي دي.
په افغانستان کې د ملګرو ملتونو سیاسي استازولی یوناما وايي، د دوی پر کاروان د کابل په سروبي ولسوالۍ اړوند برخو کې برید شوی.
یوناما پر خپله فیسبوک پاڼه لیکلي چې، دغه برید کې د ملګرو ملتونو کوم کارکوونکي یا ګاډي ته زیان نه دی رسېدلی؛ خو په افغانستان کې د دې ادارې پرسونل خوندیتوب ادارې د پنځو افغان ساتونکو په وژنه خواشیني ده.
په افغانستان کې د یوناما مرستیال رامز الکبروف هم پر خپل ټوېتر لیکلي، چې ملګري ملتونه د افغان امنیت ساتونکو د وژل کېدو له امله له افغان حکومت سره خواشیني څرګندوي.
ټیګونه
