ایران او ازبکستان کولای شي د «بشپړوونکي اقتصاد» هېوادونه وي
د ایران د اسلامي جمهوریت د ولسمشر لومړي مرستیال وویل: ایران او ازبکستان کولای شی د « بشپړوونکي اقتصاد» هېوادونه وي.
د سحاب شبکې د خبر له مخې، د ایران د اسلامي جمهوریت د ولسمشر لومړي مرستیال محمد رضا عارف د پنجشنبې په ورځ د ازبکستان د پانګونې، صنایعو او سوداګرۍ له وزیر، لذیذ قدرت اف سره په کتنه کې وویل: د دواړو هېوادونو ترمنځ د لاسليک شويو تړونونو له مخې، د تبادلې کچه بايد د ٢٠۲٤ کال تر پايه يو ميليارد ډالرو ته ورسېږي.
په دغه کتنه کې د ازبکستان د پانګونې، صنایعو او تجارت وزیر« لذیذ قدرت اف» هم په تهران کې د دواړو هېوادونو د ګډ کمیسیون له جوړېدو سره هممهاله، د ازبکستان د ظرفیتونو د نندارتون د جوړولو غوښتنه وکړه.
ایران او ازبکستان په کلتوري، سیاسي، اقتصادي او تاریخي برخو کې ډېر مشترکات لري. په تېرو دوو کلونو کې د متقابلو اړیکو د پراختیا په هدف، د ایران او ازبکستان د چارواکو ترمنځ پرله پسې سلامشورې شوي دي.
