د آذربایجان له ۷۲ مسافرو ډکه الوتکه قزاقستان کې نسکوره شوه

د قزاقستان د ټرانسپورټ وزارت ویلي چې، د آذربایجان هېواد یوه الوتکه چې ۷۲ مسافر یې روسیې ته لېږدول، د قزاقستان په اکتاو ښار کې نسکوره شوې ده.

دغه الوتکه چې نن چهارشنبه نسکوره شوې، د لومړنیو معلوماتو له مخې؛ یو شمېر مسافر ژوندي پاتي شوي دي.

د آذربایجان هوايي شرکت هم د دې الوتکې د غورځېدو خبر تایید کړی دی.

د قزاقستان د ټرانسپورټ وزارت ویلي چې د آذربایجان هوايي شرکت ۸۴۳۲ خط الوتکه د آذربایجان له باکو څخه د روسیې د ګروزني پر لور روانه وه.

د دې پېښې د رامنځته کېدو جزئیات او د احتمالي مرګ ژوبلې کره شمېر تر اوسه نه دی په ډاګه شوی.

د قزاقستان د ټرانسپورت وزارت ویلي چې په دې اړه څېړنې روانې دي.