افغانستان ته د ایران په صادراتو کې زیاتوالی راغلی
د ایران د خراسان رضوي والي غلام حسین مظفري ویلي چې دغه هېواد په روان کال کې افغانستان ته د څه باندې دوه ميليارده ډالرو په ارزښت صادرات کړي دي.
دغه ایراني چارواکي ویلي چې اجرایي ادارې باید افغانستان ته د صادراتو او له دغه هېواده د وارداتو د اسانتیا لپاره لازمه زمینه برابره کړي.
مظفري د اقتصادي اړیکو د ښه کولو لپاره په پولو او ګمرکونو کې د خنډونود کمولو پر اړتیا ټینګار کړی او په پولو کې یې د اړینو زیربناوو د جوړولو په برخه کې د ایران او طالبانو د ژمنو د ژر پلي کېدو غوښتنه کړې ده.
د خراسان رضوي د اقتصادي چارو د همغږۍ مرستيال رضا جمشیدي هم اعلان کړی چې ایراني بار وړونکي موټرونه افغانستان ته تر ننوتلو وروسته لږ تر لږه ۲۰ تر ۲۵ ورځو پورې ځنډول کېږي او د وتلو اجازه نه ورکول کېږي.
تر دې وړاندې طالبانو په کابل کې د ایران د سفیر له قوله ويلي وو، چې ایران ته د افغانستان د کلنیو صادراتو ارزښت شاوخوا ۵۰ ميليونه ډالره دی.
