د صیهونیسټ رژیم جنګي الوتکو لس فلسطیني ماشومان شهیدان کړل
خبري سرچینو راپور ورکړی چې د غزې ښار په لویدیځ کې د استوګنې په یوه کور بمبارۍ کې لس فلسطیني ماشومان شهیدان شوي دي
د پارس ټوډې په وینااسراییلي جنګي الوتکونن د غزې ښار په لویدیځ کې د شطي په کیمپ کې د استوګنې په یوه کور بمباري وکړه.
په دې بمبارۍ کې، چې اسراییلي جنګي الوتکو ادعا کړې وه د الحواجری کورنۍ کور یې په نښه کړی، لس فلسطیني ماشومان شهیدان شوي او یو شمیر نور ټپیان شوي دي.
پرون هم په غزه کې د اوربند د ټینګښت له هڅو سره سره، د اسراییلي رژیم د بریدونو له امله ۲۴ فلسطینیانو خپل ژوند له لاسه ورکړی دی.
روغتیايي چارواکي وايي چې وژل شوي ټول ښځې او ماشومان دي. اسراییلي رژیم ډېربریدونه د غزې مرکز او سویل اړوند سیمو کې کړي دي.
غزه کې د اسراییلي رژیم بریدونو سره هممهاله د امریکا ولسمشر ډونالډ ټرمپ ویلي چې روانې او یا هم راتلونکې اونۍ کې د اوربند ټینګښت لپاره ډېر چانس شتون لري. پر غزې د اسراییلي رژیم د بریدونو پیل راهیسې تر دا مهاله څه باندې ۵۷زره فلسطینیانو خپل ژوند له لاسه ورکړی او نږدې ۱۳۷زره ټپیان دي.
