د الحشد الشعبي ځواک ساتنه د ټول عراقي ولس غوښتنه ده
داعشي تکفیریان د عراق لپاره تر ټولو لويه او سخته ننګونه وه، چې موخه ئې په ټول عراق کې مذهبي جګړه رامنځته کول وو.
د عراق د عصائب اهل الحق غورځنګ عمومی منشي شیخ قیس الخزعلي په خپلو څرګندونو کې ټینګار وکړ چې د الحشد الشعبي (عوامي بسیجي ځواک ) شتون د ټول عراقي ولس غوښتنه ده.
زمونږخبریال د ایکنانیوز له قوله لیکلي دي ، الخزعلي په یولړ څرګندونو کې وویل: د حشد الشعبي ځواک د ادغام موضوع لومړی ځل د بریتانیې سفیر له خوا راپورته شوه.
هغه زیاته کړه: کله چې مونږ د امریکائي پوځیانو د وتلو غوښتنه کوو، نو دوي وائي چې داعش لا هم شته، خو کله چې دوي د حشد الشعبي د ړنګولو غوښتنه کوي، ادعا کوي چې داعش کمزوری شوی او د حشد الشعبي ځواک شتون ته اړتیا نشته.
الخزعلي زیاته کړه: داعشي تکفیریان د عراق لپاره تر ټولو لويه او سخته ننګونه وه، چې موخه ئې په ټول عراق کې مذهبي جګړه رامنځته کول وو.
هغه وویل: د عسکریین حرمین بمبارول د عراق د سوځولو لپاره د یوې لوئې دسیسې په توګه وو. سره له دې چې دا یوه لویه غمیزه وه، د الهي ارادې، دیني مرجعیت شتون او د ولس د بیدارۍ له امله دا پېښه رامنځته نه شوه او ستره دسیسه شنډه شوه.
د عراق ولسی بسیجي ځواک (الحشد الشعبی )د عراق د پوځي ځواکونو یوه برخه ده او د دغه هیواد د وسلهوالو ځواکونو د عمومي قوماندان تر قوماندې لاندې ده.
دا ځواک وروسته له دې جوړ شو چې د عراق ستر دینی مرجع آیتالله «سید علي سیستاني» د داعش تکفیري - ترهګرې ډلې له خوا د عراق پر پراخو سیمو له تسلط وروسته د جهاد کفائي فتوا صادره کړه، او دغه غورځنګ د داعش ترهګرو له شره د عراق د خلاصولو په برخې کې مهم رول ولوباوه.
