د اسرائیلو پولیسو د الاقصی جومات امام ونیوه
زمونږ خبریال راپور راکړی د اسرائیلو پولیسو په نیواکي بیت المقدس کښې د الاقصی جومات په انګڼ کښې د دغه جومات امام «شیخ محمد العباسي» ونیوه.
د فلسطین وفا خبري اژانس د ځايي سرچینو په قول وویل د اسرائیلو پولیسو پرون مازیګر له کوم دلیل پرته د الاقصی جومات په انګڼ کښې د دغه جومات امام شیخ العباسي ونیوه.
دغه خبري اژانس زیاته کړه د الاقصی جومات د امام نیول د دغه جومات پرضد د اسرائیلو رژیم د زیاتیدونکو اقداماتو په درشل کښې ترسره شوي دي.
د اسرائیلو رژیم د الاقصی جومات په خطیبانو، مبلغانو او عبادت کونکو باندې محدودیتونه لګولي دي.
د فلسطین حماس غورځنګ د الاقصی جومات د امام العباسي نیول غندلي او زیاته کړې یې ده چې دغه خطیب الاقصی جومات ته له ورننوتلو منع کړی شوی دی.
حماس غورځنګ زیاته کړه چې د اسرائیلو دغه اقدامات د الاقصی جومات په چارو کښې ستره او هغه د جومات په امامانو باندې د منلو وړ تیری بلل کیږي.
