د ایران او ازبکستان تر مینځ د همکاریو ۱۷ سندونه لاسلیک شول

د تهران او تاشکند تر مینځ د ملګرتیاو د ۱۷ سندونو د لاسلیکېدو مراسم د دواړو هیوادونو د ولسمشرانو او وزیرانو په حضور کې د سمرقند په تاریخي ښار کې تر سره شو.

د ایران او ازبکستان تر مینځ د همکاریو یادې موافقې د سوداګریو، اقتصادي فعالیتونو، ټرانزیټ، فرهنګي مبادلاتو، ګمرکاتو  او روغتیایي ډګرونو کې لاسلیک شوي دي.

په دغه مراسم کې د دواړو هیوادونو د وزیرانو له لوري د همکاریو د موافقې تر لاسلیک وروسته، د دواړو هیوادونو ولسمشران هم یوه ګډه بیانیه صادره کړې چي پکښې د تهران او تاشکند تر مینځ د اړیکو په پراختیا باندې ټینګار شوی دی.

تېره ورځ د ایران د اسلامي جمهوریت ولسمشر سید ابراهیم رئیسي د یو پلاوی په مشری سمرقند ته لاړ څو د شانګهای د همکاریو د غړو هیوادونو د مشرانو په غونډه کې برخه واخلي.