ایران او افغانستان په ریلي ملګرتیاو ټینګار وکړ
زمونږ خبریال وايي د افغانستان په چارو کښې د ایران د اسلامي جمهوریت د ولسمشر د ځانګړي استازي او د افغانستان د اور ګاډي د لارو د ادارې مشر په کتنه کښې د دواړو هیوادونو د ریلي ملګرتیاو د پراختیا په هکله بحث او د نظر تبادله وشوه.
مخکې د خواف ـ هرات د اورګاډي لاره له بیارغونې او تجهیز وروسته د ایران او د افغانستان د چارواکو په ګډون سره پرانیستل شوه.
د اورګاډي دغه لاره افغانستان د اروپا له اورګاډو سره وصلوي او هر کال د یو میلیون مسافرانو او د شپږ میلیونه ټنه شیانو د انتقالولو ظرفیت لري.
په افغانستان کښې د ایران د اسلامي جمهوریت سفارت وویل په کابل کښې د ایران د اسلامي جمهوریت د سیاسي نمایندګۍ د مشر او د ولسمشر د ځانګړي استازي حسن کاظمي قمي او د افغانستان د اورګاډو د لارې د ادارې د مشر بخت الرحمان شرافت ترمینځ په کتنه کښې د دواړو هیوادونو د ریلي ملګرتیاو د پراختیا په هکله خبرې وکړې.
په افغانستان کښې د ایران د سیاسي نمایندګۍ مشر په دغه کتنه کښې د افغانستان د اورګاډو د لارې د ادارې مشر ته بلنه ورکړه چې د دواړو هیوادونو ترمینځ د ملګرتیا په زمینو د غور لپاره ایران ته راشي.
