د ایران په دفاعي نظریه کې اټومي وسله هېڅ ځای نه لري
پارس ټوډې - د ایران د اسلامي جمهوریت د ملي امنیت د عالي شورا منشي وویل: اټومي وسله د ایران په دفاعي نظریه کې هېڅ ځای نه لري او پر دې خبرې باندې د نړیوالو څارونکو سازمانونو راپورونه ګواهي ورکوي.
د پارس ټوډې د راپور له مخې: د ایران د اسلامي جمهوریت د ملي امنیت د عالي شورا منشي علیاکبر احمدیان د چهارشنبې په ورځ په برازیل کې د بریکس په امنیتي سرمشریزه کې ټینګار وکړ: ایران به د اټومي انرژۍ د سوله ایزې کارونې حق په ګډون، له خپلو اصلي حقونو څخه تېر نه شي.
احمدیان زیاته کړه: د ایران اسلامي جمهوریت وړاندیز کوي چې د بریکس له ډیجیټل اسعارو او د ګروپونو ترمنځ د سوداګرۍ لپاره د ځانګړي او خوندي بانکي پیغام رسوونکي او د اقتصادي خپلواکۍ سمبول مخکتنه وشي او همدارنګه د د اکمالاتي زنځیر امنیت کمیټه پر ټرانسپورټي بیمې باندې په ټینګار سره، د بندیزونو ضد دهلیز جوړولو او له بهرنیو بندیزونو سره د مقابلې لپاره د ملاتړ صندوق پیلول جوړه کړي.
د ایران د ملي امنیت د عالي شورا منشي وویل: د بریکس او د هغې د غړو پر وړاندې د ځینو هېوادونو ګواښونه، د یوه پیاوړي اقتصادي، سیاسي او کلتوري بلاک رامنځته کولو لپاره د بریکس د لوی ظرفیت په اړه ژوره اندېښنه ده.
احمدیان ټینګار وکړ: د فلسطین په مسله کې، نړۍ د "قدرت له لارې سوله" او "اجباري ډیپلوماسۍ" تر سرلیک لاندې د خطرناکو خبرو اترو د تکرار شاهده ده، په داسې حال کې چې ریښتینې سوله په عدالت او د مشروع حقونو په پېژندلو کې رېښه لري.
