د ایران د ازادې غیږ نیونې ملي ټیم نړیوال اتل شو

پارس ټوډی-  د ایران اسلامي جمهوریت د ازادې غیږ نیونې ملي ټیم له وخت مخکې د نړیوالو سیالیو اتل شو.

د ایران د ازادې کشتۍ ملي ټیم د دوشنبې په ورځ، د نړیوالو اتلولۍ سیالیو د پای ته رسېدو یوه ورځ مخکې، د دې سیالیو اتلولي ترلاسه کړه؛ دا په داسې حال کې ده چې د ایران ټیم لا هم د سرو زرو مډال ترلاسه کولو چانس لري.

د پارس ټوډی د راپور له مخې، د ایران د ازادې کشتۍ ملي ټیم د ۲۰۲۵ کال په نړیوالو اتلولي سیالیو کې، چې د کرویشیا په زاګرب کې ترسره شوې، تر اوسه یو د سرو زرو مډال، یو د سپینو زرو او درې د برونزو مډالونه ترلاسه کړي دي.

د «رحمان عموزاد» او «امیرعلي آذرپیرا» د فاینل سیالیو ته د لار موندلو له امله، د ایران ټیم د متحده ایالاتو په پرتله له وخت مخکې د نړۍ اتل شو.

دا د ایران د ازادې کشتۍ ملي ټیم شپږمه نړیواله اتلولي ده.

ایران تر دې مخکې په ۱۹۶۱، ۱۹۶۵، ۱۹۹۸، ۲۰۰۲ او ۲۰۱۳ کلونو کې د نړۍ د اتلولۍ پر تخته ولاړ دی.

همدارنګه، د ایران د ازادې کشتۍ ملي ټیم ۹ ځله په ۱۹۷۱، ۱۹۷۳، ۱۹۹۵، ۲۰۰۶، ۲۰۱۱، ۲۰۱۴، ۲۰۱۵، ۲۰۲۲ او ۲۰۲۳ کلونو کې د نړۍ دویم مقام ترلاسه کړی او ۱۴ ځله یې درېیم مقام خپل کړی دی.

پزشکیان د ایران د ازادې کشتۍ ملي ټیم اتلولي وستایله

د ایران اسلامي جمهوریت ولسمشر «مسعود پزشکیان» د دوشنبې په ماښام په یو پیغام کې د ایران د ازادې کشتۍ ملي ټیم د نړیوالو سیالیو اتلولي مبارکي وویله او وویل: د ایران د ازادې کشتۍ ملي ټیم د زړورو اتلانو ویاړمنې اتلولۍ، چې ۱۲ کاله وروسته یې شپږم ځل د نړۍ لومړی مقام ترلاسه کړ، یو ځل بیا د ایران عزیز نوم د نړیوالو سپورټونو په سر کې ځای پر ځای کړ او د ایران ستر ملت ته یې خوښي او ویاړ ور په برخه کړ.