امریکا له پوځي او اقتصادي نظره د نړیوالې ترهګرۍ نمونه ده
د ایران د اسلامي شورا مشر وویل: د امریکې حکومت او د دغه هیواد وسله وال ځواکونه په پوځي او اقتصادي اړخونو کښې د نړیوالې ترهګرۍ نښه ده.
علي لاریجاني د اسلامي شورا (پارلیمان) په ننۍ ډاګیزه غونډه کښې، په سیمه کښې له ترهګرو سره په مقابله کښې د سپاه پاسداران په رول باندې په ټینګار سره زیاته کړه: د اسلامي انقلاب د پاسدارانو لښکر ترهګر نومول د امریکې د حکومت د کینې او جهالت د ژورتیا نښه ده.
هغه پخوا او اوس د سپاه پاسداران د رول په هکله وویل چې دغه ځواک په هغه جبهه کښې سرشیندنه وکړه چې د نړۍ ټول ستر قدرتونه د صدام رژیم ترڅنګ ولاړ وو او په دې وروستیو کلونو کښې چې د امریکې په لاس جوړو شویو ترهګرو سیمه ناامنه کړې وه، سپاه یې په وړاندې ودریده او ملا یې ورماته کړه.
د ایران د اسلامي شورا مشر د امریکي حکومتي چارواکو ته په خطاب کښې وویل: ولې د پاکستان د ارواښادې وزیراعظمې بې نظیر بوټو خبرې مو په یاد نه دي چې ویې ویل: په افغانستان کښې د ترهګرو ډلو اصلي جوړونکې امریکا ده ځکه نو نن باید د امریکې حکومت دا ځواب ورکړي چې د ترهګرو ډلو جوړونکی او ملاتړی پاتې شوی دی.
نن د ایران د اسلامي شورا استازو هم په یو سمبولیک خوځښت کښې د سپاه پاسداران یونیفارم اغوستی و او د پارلیمان د غونډې په پیل کښې یې د امریکې د اقدام د غندنې په موخه د (مړه دې وي امریکا) نعرې پورته کړې.
