روحاني: ايران په سيمه کښې د امنيت پياوړتيا غواړي
د ايران د اسلامي جمهوريت ولسمشر وويل، ايران په سيمه کښې د امنيت پياوړتيا غواړي او له نورو هيوادونو سره جنګ ته هيڅ ګروهنه نه لري.
ډاکټر حسن روحاني پرون د قطر له امير سره په ټيلفوني تماس کښې د نېکمرغه وړوکي اختر د مبارکۍ په ويلو سره چې زياته کړه، که يو هېواد د ايران په خلاف يو غېر عاقلانه اقدام وکړي نو بې له شکه به له پرېکنده او پښېمانونکي ځواب سره مخامخ شي.
روحاني په دې باندې په تاکيد سره چې د سيمې مسائل او مشکلات فوځي حل لاره نه لري واضحه کړه، د عراق د بعث رژيم د معدوم ډېکټاټور صدام لخوا د کويت د نيولو، په يمن باندې د سعودي او اماراتو د حملې او د قطر د حکومت د محاصرې په وختونو کښې د ايران دريځونه دا خبره ثابتوي چې ايران له جنګ، دباو او بائيکاټ سره مخالف دے.
روحاني د دې په بيانولوسره چې سعودي او امارات له ايران،يمن او قطر سره ناسم تعلقات لري وويل، د سعوديانو او اماراتيانو دغه چلند به د ټولې سيمې په زيان وي.
د قطر امير شېخ تميم بن حمد آل ثاني هم د وړوکي اختر د مبارکۍ په ويلو سره د قطر او ايران تعلقات تاريخي تعلقات وبلله او د قطر د محاصرې په وړاندې د تهران د دريځونو په قدرونې سره يې وويل، دوحه هيڅکله د تهران رغانده دريځونه نه هېروي او له دې امله په ټولو ډګرونو کښې له ايران سره د تعلقاتو د پراختيا غوښتونکے دے.
