روحاني: ايران په سيمه کښې جنګ جګړې نه غواړي
د ايران د اسلامي جمهوريت ولسمشر وويل: ايران په سيمه کښې جنګ جګړې نه غواړي خو دښمنانو ته په خپلو پولو د تيري اجازه هم نه ورکوي.
ولسمشر حسن روحاني نن د کابينې په غونډه کښې د ايران د خاورې په اوبو د امريکې د جاسوسي ډرون الوتکې تيري ته په اشارې سره وويل، که يو دښمن د ايران په پولو تېرے اوکړي نو د ايران د اسلامي جمهوريت له سرو کرښو تېر شوے دے او ايران ورته مضبوط ځواب ورکوي.
ډاکټر روحاني د دې په بيانولو سره چې بشپړه ايراني دفاعي سېسټم د امريکې جاسوسي ډرون الوتکه رانسکوره کړه، زياته کړه، ايران په سائنس ، ټېکنالوجۍ، صنعت او په فوځي او غېر فوځي برخو کښې ډېر ښه پرمختګونه کړي دي.
هغه همدارنګ د ايران په خلاف د امريکې د حکومت سياستونو ته په اشارې سره وويل، په دې ورځوکښې سپينه ماڼۍ سرګردانۍ شوې ده او د هغې د چارواکو وېناوې او خبرې ناروا او خندونکې دي.
روحاني د اېټمي وسلو ته د ايران د لاسرسائۍ په اړه د امريکې د ولسمشر ادعا ته په اشارې سره واضحه کړه، که ټرمپ ايټمي وسلوته د ايران د لاسرسائۍ په باره کښې اندېښمن دے نو ولې د اسرائيلو د غاصب رژيم په باره کښې چې دغه ټولې اېټمي وسلې لري خاموشي اختيار کړې ده.
د اسلامي ايران ولسمشر د دې په بيانولو سره چې تهران د اسلامي انقلاب د معظم رهبر د فتوې په بنياد او د اېټمي انرجۍ د نړيوال اژانس د رپوټونو له مخې د ايټمي وسلو په لټه کښې نه دے زياته کړه، امريکايانو په خپله ثابته کړه چې خبرې يې بې بنياده او دروغ دي.
روحاني د دې په بيانولو سره چې امريکايانو او اروپايانو په برجام کښې غلطه لار غوره کړې ده هغوي ته نصيحت وکړ چې په خپل قول او ژمنو دې پابند اوسي.
