تهران د یمن د محاصرې د ختمولو لپاره خپل کوششونه جاري ساتي
د ایران د خارجه وزیر مرستیال: د ایران اسلامي جمهوریت به د یمن د کلابندۍ د ختمولو او دغه هیواد ته د انساندوستانه مرستو د لیږلو لپاره خپلو هلوځلو ته همهغه شان دوام ورکړي.
په سیاسي چارو کښې د ایران د خارجه وزیر جګ پوړي مرستیال پرون مازیګر په تهران کښې د یمن د انصار الله غورځنګ د ویاند محمد عبدالسلام په کتنه کښې وویل: د ایران اسلامي جمهوریت به د یمن د کلابندۍ د ختمولو او دغه هیواد ته د انساندوستانه مرستو د لیږلو لپاره خپلو هلوځلو ته همهغه شان دوام ورکړي.
فارس خبري آژانس لیکلي چې علي اصغر خاجي په دغه کتنه کښې د یمن د کړکیچ لپاره له سیاسي حل لارې د ایران پر ملاتړ ټینګار وکړ او څرګنده یې کړه ایران د اسټاکهلم له موافقې ملاتړ کوي.
هغه په دغه ملاقات کښې هم داشان له نړیوالې ټولنې وغوښتل چې د اسټاکلهم د موافقې په وړاندې د خپلو ژمنو د بشپړې اجرا لپاره په سعودي ائتلاف باندې خپل دباؤنه زیات کړي.
په دغه کتنه کښې محمد عبدالسلام هم د یمن له خلکو د ایران د اسلامي جمهوریت د سیاسي او انساني ملاتړونو په قدرونې سره د اسټاکهلم د موافقې د اجرايي بهیر او د یمن د میداني او سیاسي بدلونونو د راتلونکي لرلید په هکله یو رپورټ وړاندې کړ.
د یمن د انصار الله غورځنګ ویاند له دې مخکښې په تهران کښې د ایران له خارجه وزیر محمد جواد ظریف سره هم ملاقات کړی و.
