نړیواله ټولنه باید د طالبانو له موقته حکومت سره تماس ولري
زمونږ خبریال وايي د پاکستان د ملي امنیت سلاکار معید یوسف (Moeed Yusuf) نن د امریکا د خارجه وزیر له مرستیالې میرمن وینډي شیرمان (Wendy Sherman) سره په کتنې کښې ټینګار وکړ چې نړیواله ټولنه باید په افغانستان کښې د طالبانو له موقته حکومت سره تماس ټینګ کړي .
د پاکستان حکومتي راډیو وویل د امریکا او د پاکستان دغو دوو (۲) چارواکو په دغه کتنې کښې د واشنګټن او د اسلام اباد ترمینځ د دوه اړخیزه اړیکو د پیاوړي کیدا په هکله خپله اراده څرګنده کړه .
د امریکا پلاوي له افغانستان څخه د خارجي هیوادونو د وګړو په ایستلو کښې د پاکستان د کوششونو او د افغانستان له کډوالو سره د اسلام اباد د مرستې ستاینه وکړه .
د پاکستان د ملي امنیت سلاکار معید یوسف دغه راز د امریکا د خارجه وزیر له مرستیالې وینډي شیرمان سره په کتنې کښې وویل د هندوستان تر کنټرول لانتدې کشمیر کښې د نوي ډیلي د بشري حقوقو خلاف ورزیانې د سیمې امنیت ته ګواښ پیښوي .
د امریکا د خارجه وزیر مرستیالې وینډي شیرمان او ورسره اوه (۷)کسیز پلاوی پرون د دوه (۲) ورځني سفر لپاره اسلام اباد ته رسیدلی دی .
د امریکا د خارجه وزیر مرستیاله له دې مخکې د دوه اړخیزه غونډو ، د مدني ټولنې د پروګرامونو او د هندوستان د تفکرونو په غونډې کښې د ګډون لپاره نوي ډیلي ته تللي وه .
پاکستان ته د امریکا د دغه چارواکي سفر په ډير حساس وخت کښې ترسره کیږي چې یوې(۱) خوا په افغانستان کښې طالبان واکمن شوي او له بلې په سیمه کښې بدلونونه روان دي .
ډیپلوماټیکو سرچینو وویل د امریکا د ولسمشر جوبایډن حکومت له پاکستان سره په خبرو کښې په څلورو (۴) مهمو ټکو یعني په افغانستان کښې د طالبانو د حکومت په رسمیت د پیژندلو ، له افغانستان سره د نړیوال تعامل ، افغانستان ته د لاسرسي او د ترهګرۍ پرضد د ملګرتیا په هکله تمرکز کوي .
