تاپي پروژه د افغانستان تر باثباته کیدو پورې ځنډیږي
یو پاکستاني چارواکي ویلي چې په افغانستان کې د ثبات تر تامینیدو پورې به د تاپي پروژې چارې وځنډیږي
د پاکستان د اقتصاد وزیر عمر ایوب خان د روسیې تاس خبري اژانس ته په مرکه کښې د دې ځنډ وجه، په افغانستان کښې د نړیوال بانک د نمایندګۍ نه موجودیت او دغه راز له افغانستان څخه د یادې پروژې د اړوندو یو شمېر تخنیکي ظرفیتونو وتل وبلل.
د ده په وینا، د یادې پروژې د چارو د بیا پيل په اړه به له وضعیت روښانیدو وروسته پریکړه وشي.
تاپي د ترکمنستان، افغانستان، پاکستان او هندوستان ترمنځ د ګازو د نل لیکې ګډه پروژه ده، چې د افغانستان له لارې د ترکمنستان ګاز پاکستان او هندوستان ته منتقلوي.
خو دغه پاکستاني چارواکي نه دي ویلي چې د دې پروژې د ځنډ پریکړه په ګډه شوې او که یوازې دوی په دې اړه دغه نظر ورکړی دی.
د ټاپي پروژې له اړخه افغانستان ته د کال تر ۵۰۰ میلیونه پورې امریکایي ډالره عاید په لاس ورتلی شي.
طالب چارواکو په دې اړه څه نه دي ویلي خو مخکښې یې د یادې پروژې د چارو د دوام خبر ورکړی و او په دې اړه یې د جدي هڅو ژمنه کړې وه.
