عمران خان له نوي لومړي وزیر سره خبرو ته تیار دی
زمونږ خبریال وايي د پاکستان له واک څخه څنګ ته کړی شوي لومړي وزیر عمران خان له نوي لومړي وزیر شهباز شریف سره د خبرو لپاره خپل چمتو والی اعلان کړ .
د پاکستان د کورنیو چارو پخواني وزیر شیخ رشید احمد د وارمخکې انتخاباتو د ترسره کولو لپاره له نوي لومړي وزیر شهباز شریف سره د خبرو اترو لپاره د پخواني لومړي وزیر عمران خان د چمتووالي د اعلانولو په ترڅ کښې ادعا وکړه زر به د دغو دوو (۲) مشرانو د کتنې سریزې برابرې شي .
شیخ رشید احمد وویل ما هڅه کړي ده چې د پاکستان د واکمن ګوند او د حکومت د مخالفو ګوندونو ترمینځ ناوړه تفاهمونه له مینځه یوسم .
هغه وویل زه د سولې او د امنیت د ټینګیدا لپاره د پاکستان د پوځ په څنګ کښې ولاړ یم خو د جنګ د رامینځته کیدا په بڼه کښې به د عمران خان په څنګ کښې وم .
د پاکستان د کورنیو چارو پخواني وزیر شیخ رشید بیا وویل پخوانی لومړی وزیر عمران خان د وارمخکې عمومي انتخاباتو د ترسره کولو لپاره د نوي لومړي وزیر شهباز شریف له حکومت سره خبرو اترو ته تیار دی .
د روسیې او د اوکراین په هکله د پاکستان د پخواني لومړي وزیر عمران خان دریځونه د امریکا د ګروهنې پرخلاف وو او د امریکا د خارجه وزارت یوه چارواکي «ډونالډ لو» ګواښ کړی و چې عمران خان به له واک څخه لیرې کړي .
د پاکستان پخوانی لومړی وزیر عمران خان وايي چې زه امریکا د پاکستان د سیاسي ګوندونو په ملګرتیا سره له واک څخه لیری کړی یم .
