پاکستان کښې د سونګو بیه زیاته شوه
د پاکستان حکومت د پیسو د نړیوالو صندوق IMF د تمهیداتو له مخې په دغه هیواد کښې د سونګو قیمت یوځل بیا زیات کړ
له اسلام آباده زمونږ د خبریال د رپورټ له مخې، په داسې حال کښې چې د پيسو نړیوال صندوق پاکستان ته د ۶ میلیارډه ډالرو د پور ورکړه په دغه هیواد کښې د مختلفو مالیاتو یا ټیکسونو په لګولو پورې شرطمنه کړې، د اسلام آباد حکومت د بریښنا او ګیس د بیو له زیاتولو وروسته د پټرولو او ډیزلو قیمتونه هم زیات کړل.
د رپورټ له مخې، په پاکستان کښې د پټرولو قیمت سر له نن(پنجشنبې) څخه په هر لیټر کښې په ۲۲ روپۍ زیاتولي سره، ۲۷۲ روپیو ته ورسید چې د پاکستان په تاریخ کښې بې مخینې بیه ده.
د پاکستان حکومت د ډیزلو بیه هم ۱۷ روپۍ زیاته کړه او د هر لیټر قیمت یې ۲۸۰ روپی وټاکه.
پاکستان د پيسو له نړیوال صندوق څخه د پور د یو میلیارډ ډالري قسط د ترلاسه کولو لپاره د نویو ټیکسونو د لګولو په هکله د دغه ارګان شرطونه منلې دي.
