محمد شهباز شریف د پاکستان منتخب لومړی وزیر شو
زمونږ خبریال راپور راکړی په پاکستان کې ملي اسمبلۍ نن ( یکشنبه د مارچ په درېیمه) د مسلم لیګ ن ګوند شهباز شریف لومړی وزیر وټاکه.
په دې ناسته کې د لومړي وزارت څوکۍ ته لږ تر لږه ۱۶۹ رایې په کار وې او د پاکستان د ملي اسمبلۍ مشر محمد ایاز صادق وویل "شهباز شریف ۲۰۱ رایې ګټلې او لومړی وزیر شو."
دی د پاکستان ۲۶م داسې لومړی وزیر چې د رایو پر بنسټ ټاکل کېږي اعلان شو، خو په ټوله کې د پاکستان ۳۳م لومړی وزیر دی.
د هغه سیال عمر ایوب ۹۲ رایې خپلې کړي دي.
عمر ایوب د تحریک انصاف لخوا دغې څوکۍ ته نومول شوی و، خو شهباز شریف د خپل ګوند تر څنګ د پیپلز او ځینې نورو وړو ګوندونو ملاتړ له ځانه سره درلود.
په ملي اسمبلۍ کې د ټاکنې دا بهیر په خورا شور ماشور او د یوه بل ضد شعار په فضا کې تر سره شو.
د عمران خان پلویانو د هغه له تصویرونو او 'ازادي' غږونو سره په ناسته کې ګډون کړی و.
شهباز شریف له ټاکل کېدو وروسته خپله لومړۍ وینا هم د مخالفو وکیلانو د سختو نارو، د اسمبلۍ د ننه ګډوډیو او اعتراضونو سره هممهاله وکړه.
دا دویم ځل دی چې د پاکستان د ملي اسمبلۍ د غړو اکثریت په شهباز شریف راټولېږي.
دی په ۲۰۲۲م کې د عمران خان له بې واکه کېدو وروسته هم لومړی وزیر ټاکل شوی و.
محمد شهباز شریف د پاکستان د پخواني لومړي وزیر نوازشریف ورور دی، له دې مخکې یې درې ځلې د پنجاب د وزیر اعلی په توګه هم دنده اجراه کړي.
دی د تحریک انصاف بنسټ ایښودونکي او پخواني لومړي وزیر عمران خان په ضد د تحریک چلولو یو مهم مشر پاتې شوی.
بل خبر دا چې د پاکستان د تحریک انصاف ګوند ویندوی روف حسین وویل بیرسټر ګوهرخان د دغه ګوند د مشر په توګه ټاکل شوی دی.
دغه راز ویل کیږي چې د پاکستان د ولسمشرۍ لپاره هم د پیپلز ګوند مشر اصف علي زرداري کاندید دی او هغه به زر د نوي ولسمشر په توګه وټاکل شي.
