پاکستانۍ څېړونکې: د ایران اټومي پروګرام د جانبدارانه رژیم منطقي ځواب دی
پارس ټوډی – د پاکستان د ستراتیژیکو مسایلو یوه څېړونکې د لویدیځ د جانبدارانه چلند په غندلو سره، چې په کې د ایران پر ضد یو اړخیزه بندیزونه شامل دي، وویل: د تهران اټومي پروګرامونه په حقیقت کې د جانبدارانه رژیم او نړیوال منافقت په وړاندې یو منطقي ځواب دی.
د اسلامآباد د سیاسي څېړنو د انستیتوت (IPRI) غړې عالیه بتول، چې د پاکستان یو له غوره تحقیقاتي څېړنځایونو څخه دی، په یوه یادښت کې د وروستیو پېښو په اړه، چې د صهیونیستي رژیم او امریکا له خوا د ایران پر اټومي تاسیساتو د تجاوز له امله رامنځته شوي، د ایران په وړاندې د لویدیځ دوهمخی چلند، د اسرائیل د اټومي وسلو د پراختیا ملاتړ او د ایران د اسلامي جمهوریت د نظام د اقداماتو مشروعیت د اټومي انرژۍ نړیوالې ادارې د انتخابي چلند په وړاندې وڅېړه.
دې څېړونکې په خپل یادښت کې لیکلي: پیاوړي او پرمختللي هېوادونه اکثراً هغه سیاستونه له پامه غورځوي چې خپله یې جوړوي، خو کمزوري هېوادونه باید د خپل امنیت د ساتنې لپاره له شرایطو سره ځان عیار کړي.
هغې زیاته کړې؛ د ایران په اړه، د هغه اټومي پروګرام د نړیوالو قوانینو د انتخابي پلي کولو له امله دی چې هېوادونه دې ته اړ باسي چې له خپل ځان دفاع وکړي.
عالیه بتول ټینګار وکړ: «ایران د موجوده نړیوال نظم د له منځه وړلو په لټه کې نه دی، بلکې د هغې موخه د تجاوز مخنیوی او په یوه دښمنانه ژئوپولیټیکي چاپېریال کې د خپل حاکمیت ساتنه ده.»
