اسلام آباد د اوکراین په جګړه کې د پاکستانیانو شتون رد کړ

د پاکستان د بهرنیو چارو وزارت د اوکراین په جګړه کې د دغه هېواد د وګړو د شتون ادعا رد کړې ده.

دغه وزارت نن  په یوه اعلامیه کې ویلي، چې د اوکراین په جګړه کې د پاکستاني جنګیالیو د شتون په اړه هیڅ ډول شواهد نشته.

دا اعلامیه تر هغې وروسته خپره شوه، چې د اوکراین ولسمشر ولادیمیر زېلینسکي د روسي ځواکونو په لیکو کې د پاکستاني جنګیالیو د شتون خبر ورکړی دی.

هغه تر دې وړاندې ویلي وو چې د پاکستان، تاجکستان، اوزبکستان او سویلي افریقا مزدوران د روسي ځواکونو تر څنګ د اوکراین پر وړاندې جنګېږي.

مسکو تر اوسه په دې اړه څه نه دي ویلي.