یونیسف: د بلوچستان د وروستیو بریدونو په قربانیانو کې ماشومان هم شته

د ملګرو ملتونو له ماشومانو د ملاتړ سازمان (یونیسف) ویلي چې د بلوچستان په وروستیو بریدونو کې ځینو ماشومانو ته هم مرګ‌ژوبله اوښتې او دا بنسټ له دې کبله اندېښمن دی.

یونیسف پرون سه‌شنبه د فبرورۍ په ۳مه راپور ورکړی چې په دې سیمه کې د تاوتریخوالي ډېرېدو د خلکو ترمنځ پراخه وېره خپره کړې او ماشومانو او کورنیو ډېر زیان ګاللی دی.

نوموړي بنسټ د قربانیانو له کورنیو سره د خواخوږۍ څرګندولو ترڅنګ ویلي چې هغوی د دغو بریدونو له سخت اغېز لاندې راغلې دي.

د ملګرو ملتونو دغه بنسټ ټينګار کړی چې ماشومان دې نه په نښه کېږي او نه دې د جګړې او تاوتریخوالي قرباني کېږي او له هغوی دې د ملي او نړیوالو قوانینو له مخې ساتنه وشي.