د اروپايي ټولنې د بهرني سیاست مسئوله سبا پاکستان ته سفر کوي
د اروپايي ټولنې د بهرني سیاست مسئوله او د دغې ټولنې د کمېسیون مرستیاله، کایا کالاس د پاکستان او اروپايي ټولنې د سټراټېژیکو خبرو اترو په اتمه غونډه کې د ګډون په موخه سبا اسلاماباد ته سفر کوي.
د پاکستان د بهرنیو چارو وزارت د مې په ۳۱مه، پر خپله اېکس پاڼه لیکلي چې په دغه سفر کې به کایا کالاس او د پاکستان د بهرنیو چارو وزیر محمد اسحاق ډار په ګډه د پاکستان او اروپايي ټولنې د سټراټېژیکو خبرو اترو د اتمې غونډې مشري وکړي.
د پاکستان د بهرنیو چارو وزارت د دغه هېواد او اروپايي ټولنې سټراټېژیکې خبرې اترې د دواړو لورو ترمنځ د رسمي سلامشورو او جوړښتي خبرو اترو تر ټولو لوړه کچه بللې ده.
د دغه وزارت د اعلان پر بنسټ، کایا کالاس به د پاکستان له ولسمشر اصف علي زرداري او لومړي وزیر شهباز شریف سره هم وګوري.
کایا کالاس په داسې حال کې اسلاماباد ته سفر کوي چې پاکستان په وروستیو اونیو کې د ایران او امریکا ترمنځ د خبرو اترو منځګړیتوب کړی او هڅه کوي چې د دواړو لورو ترمنځ د جګړې د پایته رسولو لپاره یوه هوکړه لاسلیک شي.
